=================================

We have plans to feature essays and discussions on current and historical issues of great interest to most, if not, all Wolloye.  

Please submit think pieces about:

  • Ways of supporting citizens who are openly defying the dictatorship that currently rules Ethiopia.

  • Development options for the region.

  • Major personalities in the history of Wollo which is often indistinguishable from those of Gondar and Shewa (ABBA IYESUS MOA, ABBA GEORGIS ZE-GASICHA, ABBA GREGORIOS, MEMHIR AKALE WORLD, SHEIKH HUSSENIN  JIBRIL, NEGUS LALIBELA, YIKUNO AMLAK, ATSE GELAWDEWOS, ATSE AMDE TSION, ATSE DAWIT, ATSE ZARA YAQOB, RAS ALI, RAS ALI THE GREAT, RAS/NIGUS MIKAEL, ETC.).

  • Practical ideas (Education, Health, Food Security, Technology, etc. ) that would improve the lives of the people of Wollo.

  • Ways to promote and showcase the rich artistic and musical traditions of Wollo.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~

አስተያየቶቻችሁንና ሃሳቦቻችሁን ላኩልን፦

  • ሙዚቃ፣ድርሰት፣ስነጽሁፍ፣የፈጠራ ስራዎች----ወዘተ ለሚቀርቡበት የኪነት አምድ፣

  • የፖለቲካ፣ኤኮኖሚና የማህበረሰብ ጉዳዮች ለሚቀርቡበት አምድ፣

  • ልምድና ተመክሮ የሚካፈሉበት (የትምህርትና ታሪክ ውርሰቅርስ) አምድና 

  • የህዝብ አስተያየት (ትችት) ለነነጻ አምድ።

============================================================================

   ወሎ

ከቶ አይሰለችም ስሙ ቢደጋገም፣

ወሎ ያገር ዋልታ፣ወሎ ያገር ቅመም፡፡

የዘር አምባጓሮ ያይማኖት ንትርክ ወሎ መች ለመደ፣

ስሙ ምስክር ነው፤ ፋጤ ገ/ማርያም፣ሰለሞን እንድሪስ፣

አሰለፈች አሊ፣ሙሃመድ ከበደ።

የዘመዶቹ እምነት ክርስትናና ኢስላም፣

ተጋብተው ወልደዋል፣ባንድነት ኖረዋል በፍቅር በሰላም።

መስጊድና ደብር ባንድ ሰፈር ሲኖሩ፣

ፋሲካና አረፋ ባንድ ላይ ሲያከብሩ፣

የምነት አክራሪዎች ከወሎ ይማሩ።

በወለጋ፣ አሩሲ፣በከፋ፣ ሲዳሞ፣

በሸዋ፣ በትግራይ፣ በሓረር፣ በባሌ፣

ወሎ ክፍለ ሃገር ይቅረብ በምሳሌ።

በወሎ ክልል ውስጥ በሰላሙ ቦታ፣

ተቀባይ የለውም የምነትና የዘር አክራሪ በሽታ።

በኢትዮጵያዊነቱ ዝምድናው ቢነሳ፣

ቅድመ አያቱ ጎይቶም አጎቱ ዲሳሳ።

በኢትዮጵያዊነቱ በአንድነቱ ጸንቶ፣

ዘር ሳይመለከት ከሁሉም ተጋብቶ፣

የህብረ ብሔር ድር ቤተሰብ መስርቶ።

ከጠባብ እይታ ከክልል ተሻግሮ፣

ኢትዮጵያዊነቱን አክብሮ አስከብሮ፣

ወሎዬ ይኖራል ከሁሉም ተባብሮ።

የነነዬ ድቤ የነሞሃይ አገር፣

የሸህ የቀሳውስት የወልዮች አገር፣

ወሎ በቅጥ ያውቃል ተከባብሮ መኖር።

የጊሸኗ ማርያም፣ ቅዱስ ላሊበላ፣አቡዬ፣ ተክልዬ፣

አብዱዬ ጀላሌ መርሳ አባ ገትዬ፣

መማጸኛው ናቸው ለእስላም ለክርስቲያን፣ ለሁሉም ወሎዬ።

የጋርዮሽ አገር የክርስቲያን የስላም፣

ክፉ ነገር እንጂ ወሎ ሰው አይጠላም።

እጁ አይታጠፍም እንግዳ አይዘነጋም፣

አህሪቡ ግቡ ነው ወሎ ቤት አይዘጋም።

ያለውን ጀባ ነው በቁጠባ አያምንም፣

ተካፍሎ ይበላል ተከፋፍሎ አይኖርም።

ታሪክ ቢመሰክር ትውልድ ቢናገር፣

የቆንጆ ማህጸን የባህል ማህደር፣

ከቶ የት ይገኛል ወሎን ያህል አገር?

መለስ ብለን ብናይ ታሪክ ወደዃላ፣

ወሎ ብዙ ይዟል እንደነ ውጫሌ እንደነ መቅደላ።

ለሃብተ ጊዮርጊስ ለምዬ ምኒልክ፣

የዲፕሎማሲው የፖለቲካው መስክ፣

የውጫሌ ሜዳ የውይይቱ መድረክ።

የጠላት አሻጥር አንቀጽ አስራ ሰባት የተጋለጠበት፣

የነጻነት ደወል ለተደወለበት፣

ለጥቁር አርነት ችቦ ለበራበት፣

ለአድዋ ጦርነት ምክንያት የሆነበት፣

የውጫሌ ሜዳ ይነሳ ይወደስ፣

ትውልድ እንዳይረሳው በታሪክ ይዳሰስ።

የመቅደላ ጎራ የመቅደላ ዳገት፣

አንበሳው ቴዎድሮስ የተፋለመበት፣

አዋግቶ ተዋግቶ እጅ ያልሰቀለበት፣

ግርማ ሞገስ ለብሶ ሞት የመረጠበት።

የመቅደላ ምሽግ የመቅደላ ዋሻ፣

ወኔ ሚቀሰቅስ ጀግና ማስታወሻ።

የምቅ ሃብት ጓዳ የጨዋ ሕዝብ አገር፣

ወሎ ብዙ ይዟል ጥሩ ጥሩ ነገር፣

ከቶ አያልቅበትም ቢነገር፣ቢነገር፣ቢነገር፣ቢነገር…

ጥማቴ ቢጠና ብዙ ፈሳሽ ጠጣሁ፣

እንደ ደሴ ውሃ፣እንደ ሳላይሽ ምንጭ፣የሚጥመኝና የሚያረካኝ አጣሁ።

እንደ ቦሩ ሜዳ እንደ ሩጋ ዳገት፣

እንደ ቦርከና ወንዝ እንደ ጦሳ አቀበት፣

መገን የወሎ ሰው፣

ደግነት አያንሰው፣ፍቅር አያልቅበት።

ትንሹ ትልቁን መች ይዘነጥላል፣

እታለም፣ጋሽዬ

አይዋ፣ ክንድዬ

እያለ ሲጣራ ካፉ ማር ጠብ ይላል።

ክራር ቢደረደር ማሲንቆ ቢመታ፣

አንች ሆዬ ለኔ፣ አረ ባቲ ባቲ፣አምባሰል ትዝታ፣

የቅኝቱ ጳጳስ የኪነቱ ጌታ፣

ወሎ ባህሉ ነው እንግዳ መቀበል ቁም ነገር ጨዋታ።

በደቡብ ገብቼ በሰሜን ወጣሁ፣

በምስራቅ ገብቼ በምዕራብ ወጣሁ፣

እኔስ እንደ ወሎ የጋራ አገር አጣሁ።

ማዕዛው የሚያውድ ባሪቲ ባሽኩቲ፣

ኮመቦልቻ፣ ከሚሴ፣ አሳይታና ባቲ።

ዋድላና ደላንታ ኩታበር አምባሰል፣

እንዲያ ነው አስተዋይ ፣በተፈጥሮ አዋቂ ሳይማሩ መብሰል።

ወረኢሉና ተንታ ሳይንትና የጁ፣

ተፈጥሮ የሰጠው ሁሉንም በደጁ።

ውሃ ባይጠጣ እህል ባይበላ፣

የመንፈስ ምግብ ነው የነድንቅዬ አገር ላስታ ላሊበላ።

ደሴ መሃል አገር የቆንጆ መዲና፣

የልባሞች አገር ከላላ ቦረና።

ሃይቅና ወልድያ ጃሪ ወረባቦ፣

ፍቅር መላበሻ ደርቦ ደራርቦ።

እራያና አዘቦ ቆቦና ሰቆጣ፣

ግንባሩን አያጥፍም የመጣው ቢመጣ፣

መሞቱን ይመርጣል በዘር ተሸንሽኖ ኢትዮጵያን ከሚያጣ።

ቦሩና ውጫሌ ቀለምና ሩጋ፣

አቤት አበቃቀል ያም ሸጋ ያም ሎጋ።

ያመነውን አምኖ፣

የሆነውን ሆኖ፣

የሠራውን ሰርቶ፣

የሸጠውን ሸጦ፣የገዛውን ገዝቶ፣

ሕዝብ የሚኖርበት ተግባብቶ ተስማምቶ፣

ዘር ሃይማኖት አይልም ወሎና መርካቶ።

አማርኛው የኔ፣

ኦሮሞኛው የኔ፣

አፋርኛው የኔ፣

አገውኛው የኔ፣

ትግርኛውም የኔ፣

ክርስትናው የኔ፣

እስልምናው የኔ፣

ሁሉም ክልል የኔ፣

ሁሉም ባህል የኔ፣

ያም እኔ ያም የኔ፣

ያገር ልጅ ወገኔ፣

በጣም ያኮራኛል ንጹህ ኢትዮጵያዊ ወሎዬ መሆኔ።

አገሬ አዲስ

ሰኔ 1989 ዓ.ም. (June 1997)

ሆላንድ